Пад назвай «Скарбонка краязнаўчых знаходак» прайшлі раённы і абласны этапы рэспубліканскага конкурсу для школьнікаў, у якім трэба было распавесці пра самыя цікавыя музейныя знаходкі за мінулыя два гады. За вялікую даследчую працу ахвотна ўзяліся вучаніцы 9 «Б» класа СШ № 3 імя Я.А. Томкі Аляксандра Панізнік, Маргарыта Баранава і Юлія Цыцына, якія раней займаліся ў гуртку «Арганаўты мінулага».
У музейным аб’яднанні СШ № 3 г. Мёры з’явілася безліч новых знаходак, і дзяўчатам выпала нялёгкая задача па іх сістэматызацыі, вызначэнні найбольш цікавых і каштоўных. Для апісання найперш абралі рымскія манеты, скарб барацінак, старыя кнігі і фотаздымкі, многае іншае.
Агульнае даследаванне атрымала назву «Вадаспад знаходак “арганаўтаў”». Дзяўчаты дадаткова сустракаліся з доўгажыхарамі, запісвалі ўспаміны, аналізавалі розныя дакументы. Іх працу ацанілі ў “раёне” дыпломам першай ступені. На абласным этапе, дзе выступала Ю. Цыцына, вынік адзначаны дыпломам трэцяй ступені. У ліку найлепшых на Віцебшчыне наш «Вадаспад…» накіраваўся ў Мінск. Цяпер чакаем выніку.
Вітаўт ЕРМАЛЁНАК, г. Мёры
