«Кацігарошак» у «Ветразі»
Адраджэнне значных культурных і гістарычных сімвалаў, выхаванне патрыятызму, любові і павагі да сваёй Радзімы, на аснове багатага культурнага і гістарычнага багажу краіны, якім усе беларусы павінны заслужана ганарыцца, – гэта важная частка фарміравання і развіцця нацыянальнай ідэі.
Аляксандр Лукашэнка, Прэзідэнт Рэспублікі Беларусь
У развіццё гэтага вельмі дакладнага выказвання 16 студзеня Цэнтр дадатковай адукацыі дзяцей і моладзі «Ветразь» г. Мінска правёў 2-і адкрыты конкурс апавядальнікаў беларускай народнай прозы «Кацігарошак» для школьнікаў і моладзі. Ён праводзіўся па 4-х узроставых катэгорыях ад 1 класа школы да юнакоў і дзяўчатаў.
Вельмі складаная задача па вызначэнні пераможцаў па ўсіх катэгорыях стаяла перад кампетэнтным журы, якое складалася з навукоўцаў і партнёраў Цэнтра – Беларускага дзяржаўнага ўніверсітэта культуры і мастацтваў, Цэнтра даследаванняў беларускай культуры, мовы і літаратуры НАН Беларусі, Нацыянальнага цэнтра мастацкай творчасці дзяцей і моладзі, Міністэрства адукацыі Рэспублікі Беларусь, грамадскага аб’яднання «Беларускі фонд культуры», установаў адукацыі і культуры нашай краіны.
Выканальніцкае майстэрства апавядальнікаў было скіраванае на сцэнічную падачу беларускай народнай казкі, лічылкі, хуткамоўкі, што нарадзіліся ў народзе шмат стагоддзяў таму і захаваліся дзякуючы перадачы ад пакалення да пакалення (часцей у вуснай народнай творчасці).
«Ветразь» і нязменны кіраўнік фестывалю фальклорнага мастацтва «Берагіня» Мікалай Козенка ажывілі народную прозу праз майстэрства дзяцячага і юнацкага выканальніцтва школьнікаў, не пабаімся сказаць – праз масавасць іх удзелу, праз сапраўдную адданасць нацыянальнай ідэі бацькоў і настаўнікаў гэтых дзяцей.
Прыемна адзначыць, што кола ахвочых паспаборнічаць у конкурсе апавядальнікаў, пашыраецца. Да канкурсантаў «Кацігарошка» далучыліся навучэнцы іншых установаў адукацыі: сярэдніх школ № 30 і № 159, гімназіяў № 18 і № 56.
Сярод пераможцаў «Кацігарошка» ўжо прызнаныя лідары – дыпламанты папярэдняга конкурсу, якія ўдасканалілі сваё майстэрства і падняліся на больш высокую прыступку: Ганна Дзядзюля, вучаніца СШ № 71, якая заняла 1 месца (казка «Пшанічны каласок» у катэгорыі Б «Казка», «Хуткамоўка»), Аляксандра Гірына з Мётчанскага вучэбна-педагагічнага комплексу дзіцячы сад – сярэдняя школа Барысаўскага раёна ў катэгорыі В («Казка», «Легенда») і катэгорыі Г («Казка – імправізацыя на зададзеную казкавую тэму»).
Трохі сдаў свае пазіцыі Іван Гузан з Мётчанскага вучэбна-педагагічнага комплексу дзіцячы сад – сярэдняя школа Барысаўскага раёна з казкай «Пра зайчыка», але застаўся ў тройцы прызёраў (3 месца).
Цудоўна выступілі і дэбютанты ў катэгорыі А «Казка», «Лічылка» з гімназіі № 18 Дарья Лосік (2 месца за казку «Як курачка пеўніка ратавала») і Андрэй Важнік (3 месца за казку «Дзедава рукавічка»), якіх падрыхтавала Святлана Яфімава, а таксама вучаніца Альбіна Яцкевіч з СШ № 159 (3 месца за казку «Ішоў мальчык», кіраўнік Святлана Балцэвіч).
Таксама прызнаныя лепшымі:
у катэгорыі А «Казка», «Лічылка» вучань Мётчанскага вучэбна-педагагічнага комплексу дзіцячы сад – сярэдняя школа Барысаўскага раёна Кірыл Кудзін (1 месца за казку «Бабы Вольчыны казкі», кіраўнік Тамара Цыганкова), выхаванка «Ветразя» Сафiя Лук’янцава (2 месца за казку «Пан і казачнік», кіраўнік Алена Дварнічэнка);
у катэгорыі Б «Казка», «Хуткамоўка» – вучань СШ № 11 Руслан Касарэўскі (2 месца за казку «Людзей слухай, а свой розум май», кіраўнік Элеанора Каплан).
У катэгорыях В «Казка», «Легенда» і Г «Казка – імправізацыя на зададзеную казкавую тэму» перамаглі:
– вучаніца Мётчанскага вучэбна-педагагічнага комплексу дзіцячы сад – сярэдняя школа Барысаўскага раёна Таццяна Абрамовіч (1 месца за казку «Ліпнічак», кіраўнік Алена Сусолкіна);
– студэнтка Беларускага дзяржаўнага шніверсітэта культуры і мастацтваў Патрыцыя Свіціна (2 месца за казку «Спевы ваўка», кіраўнік Таццяна Пладунова);
– удзельніца фальклорнага калектыву «Мілавіца» з «Ветразя» Паліна Чэпа (3 месца за казку «Шаптуха», кіраўнік Марыя Снітко).
Усе ўдзельнікі конкурсу апавядальнікаў беларускай народнай прозы «Кацігарошак» атрымалі дыпломы, пераможцы ў дадатак узнагароджаныя медалямі і памятнымі сувенірамі, а гледачы – прыемнымі ўражаннямі і добрым настроем.
На наш погляд, каб дадаць больш цікавасці да апавядальнікаў, можна было б увесці прыз глядацкіх сімпатыяў.
«Краязнаўчая газета» віншуе пераможцаў і жадае ўсім далейшага ўдасканалення майстэрства апавядальнікаў, новых ведаў і поспехаў у засваенні народных традыцыяў і чарговых дасягненняў. Хай «Кацігарошак» каціцца далей, абуджае цікавасць і збірае прыхільнікаў па ўсёй краіне.
Наталі КУПРЭВІЧ
Фота аўтара
