Невядомы драматург

Тры юбілеі п’есы Кандрата Лейкі

Беларускі паэт, празаік, публіцыст, драматург і педагог Кандрат Лейка (1860 – 1921) нарадзіўся на Слонімшчыне ў вёсцы Збочна. Роўна 105 гадоў таму, у 1912 годзе, у Вільні асобнай маленькай кніжачкай выйшла з друку яго п’еса для дзяцей «Снатворны мак». Яе Кандрат Лейка прысвяціў дзецям Слонімскага павета. П’еса пакла­ла пачатак беларускай нацыя­нальнай драматургіі для дзяцей.

Чытаць далей…

Упершыню гэты твор нашага земляка быў пастаўлены рэжы­сёрам Язэпам Камаржынскім у Дзвінску ў 1922 годзе. У спектаклі тады выступалі вучні ўзорнай бе­ларускай школы пры Беларускіх настаўніцкіх курсах Дзвінска. Гэта адбылося 95 гадоў таму.

Другі раз сцэнічнае жыццё п’еса Кандрата Лейкі «Снат­ворны мак» атрымала ў горад­зе Краснаполле Магілёўскай вобласці. Мясцовы народ­ны тэатр у 1987 годзе таксама звярнуўся да п’есы нашага зем­ляка. Яе паставіў тэатральны рэжысёр Валянцін Ермаловіч. Было гэта 30 гадоў таму.

П’еса «Снатворны мак» – гэта навеяны фальклары­стычным духам і паэтычнас­цю драматычны твор, у якім аўтар выяўляе гуманістычныя ідэалы. У п’есе дзейнічаюць адухоўленыя вобразы кветак – Маку, Званочка, Ружы, Рэзеды, а таксама вобразы Пчалы, Асы, Мурашкі, Матыля, Коніка. Ёсць тут і міфалагічны вобраз добра­га Дзеда-Лесавіка. П’есай «Снат­ворны мак» Кандрат Лейка паказаў сваю блізкасць не толькі да беларускай народнай песні, але і да казкі, да міфалагічных традыцыяў нашага фальклору.

Сяргей ЧЫГРЫН

(Паводле электроннага выдання «Слонімскі край». 2017, № 6)